Imibereho y’abaturage

Rubavu: Irangizarubanza rikekwamo ruswa ryongeye gusubikwa ku nshuro ya 5

Photo

Ku nshuro ya gatanu irangizwa ry’urubanza rukomeje kunugwanugwamo ruswa ryongeye gusubikwa nyuma yuko noneho umufasha mu by’amategeko ukorera mu karere ka Rubavu (Aba bazwi nka MAJ) ari we wabigizemo uruhare aho ngo yabujije polisi guha umuhesha w’inkiko abapolisi bamufasha kujya kurangiza urwo rubanza rumaze amezi umunani rubaye itegeko.

Bimaze kuba ubugira gatanu irangizwa ry’urubanza bene NTIBANYENDERA Laurent batsinzemo uwitwa NTURANYENINKIKO Jean Paul ku mitungo yasizwe n’ababyeyi babo riburizwamo, nubwo hagiye gushira umwaka uru rubanza rubaye itegeko, ndetse hakaba hashize amezi atanu minisitiri w’ubutabera wakiyambajwemo agitanzeho umurongo wo gushaka umuhesha w’inkiko wabafasha kurangiza uru rubanza, abahesha b’inkiko bose bagiye bagerageza kwinjira mu kurangiza uru rubanza bagiye bahuriramo n’imbogamizi zitandukanye nyamara bemeza ko nta cyakabaye kibuza aba bana guhabwa imitungo yabo nk’uko Maitre NYIRASHYIRAMBERE Emerance wari ugiye kururangiza kuri iyi nshuro na we yabibwiye TV/Radio1.

Hagati aho ariko abagomba kurangirizwa urubanza bo bavuga ko bakurikije uko impamvu ziburizamo irangizwa ry’urubanza rwabo zihora zihindagurika bibagaragariza ko hashobora kuba hari ruswa ibyihishe inyuma.

Ku ruhande rwa SERUGO Michel, umuhuzabikorwa wa MAJ mu karere ka Rubavu avuga ko hari impamvu nyinshi zituma uru rubanza rudashobora kurangizwa zifitanye isano na rwo zirimo n’izarezwemo abandi bahesha b’inkiko bagiye bagerageza kururangiza, bityo akavuga ko kuba irangizwa ryarwo ryongeye kuburizwamo ku nshuro ya gatanu nta ruhare yabigizemo.

Hari andi makuru avuga ko umunyamabanga nshingwabikorwa w’urugaga rw’abahesha b’inkiko na we hari ukuntu yaba afite akaboko mu kudindiza irangizwa ry’uru rubanza, aho ngo umuheshwa wese ushatse kwinjira muri uru rubanza amuha gasopo agasubira inyuma. Nubwo benshi mu bahesha b’inkiko binjiye muri iki kibazo batatinyutse kubihamiriza umunyamakuru, ariko abarangirizwa urubanza na bo ngo hari amakuru babifiteho aho bagiye bukwerekwa ubutumwa uyu muyobozi yagiye yoherereza abo bahesha abasaba kubivamo.

Ku ruhande rwe, umunyamabanga nshingwabikorwa w’urugaga rw’abahesha b’inkiko b’umwuga Anastase BALINDA tutabashije kuvugana mu butumwa bugufi yagize ati: “iby’icyo kibazo wabibaza abahesha b’inkiko ni bo barangiza imanza bubahiriza amategeko........”.

Ku cyo ashinjwa cyo kugira uruhare mu kudindiza irangizwa ry’uru rubanza ho yagize ati: “Ntabwo bishoboka. Ni icyemezo kiri mu bubasha bw’inkiko, ni nayo mpamvu uwo musaza ahora abarega mu nkiko abo abona bamukorera ibyo inkiko zitategetse.”

Abanyamategeko batandukanye bakomeza gutanga ibitekerezo kuri iki kibazo nta wuhakana ko abo bana badafite ukuri mu gusaba guhabwa iyo mitungo yasizwe n’ababyeyi babo nk’uko byanagaragajwe n’inkiko, ariko icyo abakomeza gutambamira irangizwa ry’urubanza bakomeza kugaragaza ni uko ngo aba bana bakwiye gusubira kuregera guhabwa imitungo, ibintu bafata nko gukomeza kubasiragiza mu manza ari nacyo kibazo bari basabyeho ubufasha minisitiri w’ubutabera akabagira inama yo gushaka umuhesha w’inkiko wabafasha guhabwa uburenganzira busesuye ku mitungo yasizwe n’ababyeyi babo ibintu na byo bikomeje kugorana dore ko abahesha bose bagerageje kubyinjiramo bahitaga baregwa mu nkiko n’izo nshingano batazishoje.



Andika / Soma Ibitekerezo 1
  1. Patrick

    Wednesday 9 October 2019

    wowe wanditse iyi nkuru byaba byiza ushyizeho icyemezo cy’urubanza rurangizwa kugira abasoma bamenye neza icyo umucamanza yategetse. Naho ibindi byaba ari amarangamutima kandi muzashake umunyamategeko abasesengurire icyemezo cy’urukiko murakoze

Leave a Reply

Your email address will not be published. Required fields are marked *

Inkuru Twaguhitiyemo

TV1 started operating in February, 2014 with a wonderful vision to be the best education and entertainment TV station in Rwanda. Our strategic goal was to attract the Rwanda population to a new level of not only national, but also international awareness. Our mission as TV1 was to contribute to the development of Rwanda through the amazing programs we air on television. Such programs are educative, entertaining, have up to date news and 80 percent of the content is in Kinyarwanda.

Copyright © 2019 All right reserved to TV & Radio 1 - At the Heart of Content!.

To Top