Rutahizamu w’umunyagaha Jordan Ayew ukina mu ikipe ya Crystal Palace mu Bwongereza yegukanye ibihembo bitatu muri iyo kipe nyuma yo kurangiza umwaka w’imikino wa 2019-2020 iyi kipe igasoza iri ku mwanya wa 14.

Jordan Ayew yegukanye igikombe cy’umukinnyi mwiza w’umwaka mu ikipe ye atowe na bagenzi be, umukinnyi mwiza w’umwaka witwaye neza mu ikipe yose ndetse igitego cye yatsinze muri uyu mwaka w’imikino cyatowe nk’igitego cyiza cy’umwaka .

Igitego cya Jordan Ayew cyatowe nk’icyumwaka wa 2019-2020, ni igitego yatsinze ubwo hari mu mukino bari basuyeyo ikipe ya Westham ukaba wari umukino wo ku munsi wa 19 wa shampiyona yo mu Bwongereza akaba yaragitsinze mu minota ya nyuma kinabahesha itsinzi y’ibitego 2-1 muri uwo mukino.

Jordan Ayew yageze muri Crystal Palace mu mpeshyi za 2019 avuye mu ikipe ya Swansea City. Amaze gukinira Crystal imikino 57 aho yatsinzemo ibitego 10.